វាអស្ចារ្យណាស់នៅពេលដែលយើងត្រូវបានគេអញ្ជើញទៅសម្ភាសរក ការងារ។ ប៉ុន្តែ ឱកាសនៃការធ្វើខុសនឹងកើតមានឡើងដូចជាការស្លៀកពាក់ ការរៀបចំអត្តចរិតជាដើម។ ការត្រៀមខ្លួនត្រូវតែមានភាពឥតខ្ចោះ បើពុំដូចនេះទេអ្នកនឹងមិនទទួលបានការងារ និងទទួលបានប្រាក់ខែដែលអ្នកសមនឹងទទួលបាននោះឡើយ។
ដើម្បីជួយអ្នកឲ្យទទួលបាននូវភាពជោគជ័យ LIFT
បានសម្ភាសជាមួយ អ្នកស្រី ស៊ុយ សុខា អ្នកគ្រប់គ្រងផ្នែកជ្រើសរើសបុគ្គលិកមកពីក្រុមហ៊ុន HRInc. Cambodia និងលោក ចាន់ រដ្ឋា ប្រធានផ្នែកលក់នៃក្រុមហ៊ុនធានារ៉ាប់រងជីវិត ManuLife។
អនុវត្តនូវចំណុចគន្លឹះទាំង ១០ នេះដើម្បីទទួលបានឱកាសជាច្រើនក្នុងការទទួលបានការងារក្នុងក្តី សុបិនរបស់អ្នកយ៉ាងអស្ចារ្យបំផុត។
១. គួរដឹងឲ្យច្បាស់ពីចំណាប់អារម្មណ៍របស់អ្នកចំពោះការងារនិងហាត់រៀនឆ្លើយសំណួរជាមុន
លោក រដ្ឋា បាននិយាយថា៖ «ដំបូង អ្នកត្រូវតែចូលចិត្តនូវអ្វីដែលអ្នកនឹងត្រូវធ្វើ។ បន្ទាប់មក អ្នកត្រូវតែមានជំនាញ និងចំណេះដឹងដែលគេត្រូវការសម្រាប់ធ្វើការងារនេះឲ្យបានល្អ។ អ្នកត្រូវជឿជាក់ថា អ្នកនឹងធ្វើការងារនោះបានល្អ។ អ្នកត្រូវអនុវត្តឆ្លើយរាល់សំណួរដែលអ្នកគិតថា គេនឹងសួរអ្នកក្នុងពេលសម្ភាសរហូតទាល់តែចម្លើយនោះមានលក្ខណៈចេញ ពី ធម្មជាតិ និងមាន ភាពស្មោះត្រង់»។
២. និយាយស្ដីឲ្យបានសមរម្យនៅពេលក្រុមហ៊ុនទូរស័ព្ទហៅទៅសម្ភាស
អ្នកស្រី សុខា បានផ្តល់ជាយោបល់ថា៖ «នៅពេលយើងទទួលទូរស័ព្ទពីក្រុមហ៊ុន កុំទម្លាប់និយាយ «អាឡូ ពួកម៉ាក ឬក៏អាឡូអត់ក្បាល អត់កន្ទុយ» នោះ។ ត្រូវបញ្ជាក់ថា តើយើងត្រូវទៅជួបអ្នកណា នៅម៉ោងប៉ុន្មាន នៅឯណាក្នុងការសម្ភាស។ ជួនកាលគេមិនប្រាប់យើងច្បាស់ទេ ដោយគ្រាន់តែប្រាប់ពីទីកន្លែង និងពេលវេលាណាត់ជួបប៉ុណ្ណោះ ដូច្នេះយើងត្រូវសួរគេបញ្ជាក់ឲ្យបានច្បាស់»។
៣. ត្រូវដឹងពីទីតាំងដែលអ្នកនឹងត្រូវទៅសម្ភាសជាមុន
អ្នកស្រី សុខា បានលើកឡើងថា៖ «បើការសម្ភាសធ្វើឡើងនៅថ្ងៃស្អែក អ្នកគួរស្វែងរកទីតាំងក្រុមហ៊ុននោះឲ្យហើយនៅថ្ងៃនេះដើម្បីឲ្យ ដឹងច្បាស់ពីទីតំាងរបស់វា។ អ្នកមិនអាចទៅសម្ភាសយឺតម៉ោងបានទេ»។
៤. ស្លៀកសម្លៀកបំពាក់អ៊ុតស្អាត និងតុបតែងខ្លួនឲ្យសមសួន
អ្នកស្រី សុខា បាននិយាយថា៖ «តាំងពីក្បាលដល់ចុងជើង ត្រូវប្រាកដថា វាឲ្យសមរម្យ (មានវិជ្ជាជីវៈ)។ សក់ត្រូវសិតឱ្យបានស្រួលបួល។ ខោ អាវត្រូវអ៊ុតឲ្យស្អាត ឲ្យមានភ្លី ដើម្បីទៅសម្ភាស។ មិនសំខាន់ថា ខោអាវអ្នកថ្មី ឬចាស់ទេ សំខាន់ត្រូវចេះអ៊ុតវាឲ្យអ្នកសម្ភាសយើងមើលទៅដឹងថា យើងជាអ្នកអាជីពតែម្ដង»។ បើជាស្ត្រី គួរតុបតែងមុខមាត់ឲ្យសមរម្យ មិនមែនតុបតែងមុខដូចពេលទៅចូលរួមពិធីជប់លៀងនោះទេ។ កុំសិចស៊ីពេក។ សូមអត់ធ្មត់។
៥. សង្កេតមើលបរិស្ថានការងាររបស់ក្រុមហ៊ុន
៦. គោះទ្វារមុនចូល និងការសម្ដែងការគួរសម
អ្នកស្រី សុខា បានលើកឡើងថា៖ «មុនពេលចូល យើងត្រូវគោះទ្វារ ដោយគោះកុំឲ្យខ្លាំង ឬច្រើនដងពេក។ កុំទៅដល់បើកទ្វាររុញទៅតែម្ដងដោយមិនបានគោះនោះ។ ប្រសិនបើពេលដែលចូលទៅអត់មានអ្នកណាស្វាគមន៍យើងមុនទេនោះ យើងត្រូវស្វាគមន៍គេមុនតាមបែបខ្មែរ បើមើលទៅគេជាខ្មែរ។ ត្រូវចងចាំថា កុំលូកដៃ (ចាប់ដៃ) មុនពេលដែលអ្នកសម្ភាសរបស់យើងហុចមករកយើង (ហុចចាប់ដៃ)។
៧. អង្គុយឲ្យបានសមរម្យ
អ្នកស្រី សុខា បានគូសបញ្ជាក់ថា៖ «ពេលខ្លះគេអត់ហៅយើងអង្គុយទេ គេចាំមើលថា យើងធ្វើយ៉ាងម៉េចប្រសិនបើគេមិននិយាយអ្វីនោះ ឬព្រោះគេជាប់រវល់។ ដើម្បីចៀសវាងករណីនេះ យើងអាចសួរគេថា អត់ទោសខ្ញុំអាចអង្គុយបានទេ? ចៀសវាងអង្គុយផ្ដេកផ្ដួលទៅលើកៅអី ឬក៏ដាក់ដៃមួយចំហៀងច្រត់លើកៅអី។ ត្រូវអង្គុយដាក់ដៃលើភ្លៅរួចអង្គុយឲ្យត្រង់ខ្លួន ឬក៏យើងអាចដាក់ដៃលើតុអាស្រ័យលើមួយណាដែលយើងយល់ថា វាងាយស្រួលជាង»។
៨. ឥរិយាបថក្នុងពេលសម្ភាស
អ្នកស្រី សុខា បាននិយាយថា៖ «កុំបង្ហាញទៅអ្នកសម្ភាសយើងថា អ្នកអស់កម្លាំង ឬធុញទ្រាន់នោះ។ ទំនាក់ទំនងតាមក្រសែភ្នែក ការញញឹមគឺជាការចំាបាច់ ពីព្រោះវាបង្ហាញថា យើងបានត្រៀមខ្លួនរួចរាល់ និងជាបេក្ខជនល្អដែលគេត្រូវការ។ កុំភ័យពេក ហើយកុំមានជំនឿហួសពេក។ បើភ័យពេក អ្នកមិនអាចនិយាយពីអ្វីដែលអ្នកបានត្រៀម។ បើអ្នកមានជំនឿជ្រុលពេក អ្នកអាចនឹងមិនបានត្រៀមខ្លួនឲ្យបានដិតដល់»។
៩. ការចេះមើលទឹកមុខ
អ្នកស្រី សុខា បានបង្ហើបប្រាប់ថា៖ «នៅពេលឆ្លើយសំណួរ អ្នកគួរតែសម្លឹងមើលមុខអ្នកសម្ភាស។ ប្រសិនបើអ្នកមើលឃើញថា ពួកគេអារម្មណ៍ធុញទ្រាន់ដោយសារតែយើងនិយាយច្រើនពេក ត្រូវបន្ថយឲ្យឆាប់បញ្ចប់សេចក្ដី។ តែបើមើលទៅគេដូចជាចង់ដឹងបន្ថែមពីយើងដោយគេសួរសំណួរបន្ថែម យើងត្រូវនិយាយឲ្យបានច្រើនបន្តិច។
១០. សំណួរចុងក្រោយដែលត្រូវសួរទៅអ្នកសម្ភាស
អ្នកស្រី សុខា បានពោលថា៖ «នៅមុនពេលបិទបញ្ចប់ការសម្ភាស អ្នកសម្ភាសអាចសួរយើងថា មានសំណួរអ្វីឬអត់។ យើងអាចបង្ហាញពីចំណាប់អារម្មណ៍របស់យើងលើក្រុមហ៊ុនគេ។ យើងអាចសួរគេថា តើក្រុមហ៊ុនដែលយើងនឹងទៅធ្វើការជាមួយនោះយ៉ាងម៉េចដែរ? ហើយយើងក៏អាចសួរដែរថា តើបុគ្គលិកលក្ខណៈបែបណាដែលគេគិតថាត្រូវនឹងការងារនេះ? នៅពេលដែលគេពន្យល់មក យើងអាចដឹងដោយប្រយោលថាយើងត្រូវ ឬក៏មិនត្រូវនឹងការងារនោះ»។
ការចរចាប្រាក់ខែ
អ្នកស្រី សុខា បានលើកឡើងថា៖ «អ្នកត្រូវគិតឲ្យបានច្បាស់អំពីប្រាក់ខែដំបូង។ ខ្ញុំមិនណែនាំឲ្យយុវជនមើលឃើញតែប្រាក់ខែច្រើននៅពេលចាប់ផ្ដើម ធ្វើការងារឡើយ។ ពួកគេគួរតែផ្ដល់តម្លៃលើបទពិសោធជាងប្រាក់ខែ»។ អ្នកស្រី ក៏បានណែនាំអ្នកឲ្យសួរទៅកាន់អ្នកផ្ដល់ការសម្ភាសអំពីភារកិច្ច គោលការណ៍នៃការងារ ថ្ងៃឈប់សម្រាក និងឱកាសផ្សេងៗដែលជួយពួកគេឲ្យអភិវឌ្ឍបន្ថែម។
លោក រដ្ឋា បានបន្ថែមថា៖ «ត្រូវតែស្មោះត្រង់។ អ្នកគួរតែដឹងអំពីចំនួនប្រាក់ខែប៉ុន្មានដែលសមនឹងសមត្ថភាពរបស់ អ្នក រួចសឹមចរចាបន្ថែមនៅពេលក្រោយ។ សូមធ្វើជាអ្នកចរចាដ៏ចំណានជាមួយនឹងចំណេះដឹង និងសមត្ថភាពពិតប្រាកដរបស់អ្នក៕
0 comments:
Post a Comment